काठमाडौं,२९ साउन
बागमती प्रदेशको स्वास्थ्य मन्त्रालयले आफूमातहतका सबै प्रादेशिक अस्पतालहरूमा बिरामी भर्ना सेवा निःशुल्क गर्न निर्देशन दिएको छ।
यही साउन २२ गतेको मन्त्रीस्तरीय निर्णयअनुसार मन्त्रालयले साउन २८ गते आइतबार उक्त सूचना जारी गर्दै भर्ना सेवा निःशुल्क गर्न निर्देशन दिएको हो। मन्त्रालयले भदौ १ गतेबाट लागू हुनेगरी नागरिकहरुको निःशुल्क भर्ना गर्न प्रदेश सरकार मतहातका १३ अस्पताललाई निर्देशन दिएको हो।
अस्पतालका क्याविन, एनआईसियू र आईसियू बाहेक अन्य सम्पूर्ण शय्याहरु निःशुल्क हुने भएको छ। गत साउन २२ गतेको मन्त्रीस्तरको निर्णय अनुसार प्रदेशका १३ जिल्लाका १३ प्रादेशिक अस्पतालका ८११ वटा शय्या नागरिकहरुका लागि निःशुल्क उपलब्ध हुने मन्त्री उत्तम जोशीले बताए।
त्यस्तै मन्त्रालयले भदौ १ गतेदेखि लागू हुने गरी प्रदेशभित्रका १३ वटा आयुर्वेद केन्द्रलाई पनि रिह्यावीटेसन सेवा र फिजियोथेरापी सेवा निःशुल्क गर्न निर्देशन दिएको छ।
साथै प्रदेशका सरकारी, निजी, सहकारी र सामुदायिक अस्पतालहरुलाई सामाजिक सेवा इकाई स्थापना गरी विपन्न, असहाय तथा बेवारिसे बिरामीको उपचार व्यवस्थित गर्न मन्त्रालयले निर्देशन जारी गरेको छ।
