काठमाडौँ,३० साउन
काभ्रेको बनेपा नगरपालिका १३ स्थित अरनिको राजमार्ग अन्तर्गत भैसीपाटीमा भएको सवारी दुर्घटनामा आज २१ वर्षे युवको मृत्यु भएको छ ।
मङ्गलबार बिहान बनेपाबाट काठमाडौँतर्फ जाँदै गरेको बागमती प्रदेश ०२–०३४ प ११६७ नम्बरको मोटरसाइकल आफैँ अनियन्त्रित भई विपरीत दिशाबाट आउँदै गरेको बा प्र ०३–००१ ख १५८६ नम्बरको १० चक्के ट्रकको मुनि छिर्दा धुलिखेल नगरपालिका ८ बस्ने वर्ष २१ का अभिषेक न्यौपानेको मृत्यु भएको हो ।
गम्भीर घाइते अवस्थामा न्यौपानेलाई उपचारका लागि धुलिखेल अस्पताल लगिएको थियो । उपचारकै क्रममा बिहान ११ बजेतिर उनको मृत्यु भएको इलाका प्रहरी कार्यालय बनेपाका प्रमुख प्रहरी नायब उपरीक्षक रेशम बोहोराले जानकारी दिए।
