काठमाडौं । ब्रिटिश गोर्खा भूतपूर्व सैनिक संगठन (बिगेसो) ले माघ २४ गतेलाई सम्पूर्ण गोर्खा सैनिकहरूको ऐतिहासिक दिवसको रूपमा मनाउने निर्णय गरेको छ । बिगेसोले गोर्खा सैनिकहरू विरुद्ध भैरहेको अन्याय, असमानता र विभेदका विरुद्ध न्याय, समानता र स्वाभिमानका लागि विभिन्न आन्दोलन चलाउँदै आएको छ ।
बिगेसोले सर्वोच्च अदालतबाट वि.सं. २०७९ माघ २४ गते निर्देशनात्मक आदेश प्राप्त गरेको थियो । सन् १९४७ नोभेम्बर ९ को गोर्खा भर्तीसम्बन्धि त्रिपक्षीय सन्धि खारेजीको विषयमा बिगेसोले दायर गरेको रिट निवेदनमाथि सुनवाई गर्दै सर्वोच्चले कार्यान्वयनका निम्ति निर्देशनात्मक आदेश जारी गरेको थियो । सो दिनलाई सम्पूर्ण गोर्खाले ऐतिहासिक उपलब्धि हासिल गरेको महसुश गरेका बिगेसोले जनाएको छ ।
बिगेसोले यही माघ २४ गते काठमाडौंको शान्ति बाटिकामा वृहद् जनप्रदर्शन र जनसभा लगायतका कार्यक्रम सम्पन्न गर्न गइरहेको बिगेसोका अध्यक्ष पदमसुन्दर लिम्बुले जानकारी दिएका छन् । यो विषय गोर्खाहरूको समस्या मात्र नभएर सम्पूर्ण नेपाल र नेपालीहरूको राष्ट्रिय स्वाधीनता र सार्वभौमिकतासँग जोडिएको विषय रहेको उनले बताए ।
अध्यक्ष लिम्बुले भने, ‘सार्वभौम सम्पन्न नेपालीमाथि भएको पक्षपातपूर्ण सन्धिको विरुद्धमा हामी नेपालीहरू एकजुट भएर वि.सं.२०७९ माघ २४ गतेको फैसला कार्यान्वयनका लागि संगठित भएर दबाबपूर्ण अन्दोलन गर्ने बेला आएको छ ।’
सन् १९४७ को नेपाल, भारत र संयुक्त अधिराज्यबीच भएको त्रिपक्षीय सम्झौता अन्तर्गत भर्ती भएका गोर्खा सैनिकहरूका कतिपय मागहरू पूरा भए पनि धेरै मागहरू पूरा हुन सकेका छैनन् ।
गोर्खा सैनिकहरू विरुद्ध भैरहेको अन्याय, असमानता र विभेदका विरुद्ध न्याय, समानता र स्वाभिमानका लागि आन्दोलन र संघर्षको सुरुवात भएको तीन दशक भइसकेको छ ।
