काठमाडाैं, ९ जेठ
शंखमुलस्थित सार्वजनिकस्थलमा २ किशोरमाथि खुँडा प्रहार भएको छ। खुँडा प्रहार गरेको आरोपमा प्रहरीले ३ जनालाई पक्राउ गरेको छ।
जेठ ७ गते साँझ साढे ६ बजेतिर शंखमुलमा कैलालीको लम्कीचुहा नगरपालिका–४ अमरपुर घर भइ काठमाडौं बुद्धनगर बस्दै आएका १९ वर्षीय जगत शाही र कैलालीको टीकापुर नगरपालिका–१ घर भइ बुद्धनगर नै बस्दै आएका १८ वर्षीय प्रकाश शाहीमाथि खुँडा प्रहार भएको थियो।
अछामको कमलबजार घर भइ काठमाडौं कलंकी बस्ने २१ वर्षीय विशाल खड्का, सुर्खेतको वीरेन्द्रनगर–१ घर भइ काठमाडौं कीर्तिपुर बस्ने २० वर्षीय लोकेन्द्र विष्ट र कैलालीको टीकापुर–५ घर भइ काठमाडौं बल्खु बस्ने २३ वर्षीय चरण विष्ट पक्राउ परेका छन्।
खुँडा प्रहार भएको जानकारी पाउनासाथ जिल्ला प्रहरी परिसर ललितपुरबाट खटिएको टोलीले खुँडासहित त्यति नै बेला चरण विष्टलाई पक्राउ गरेको थियो। फरार रहेका लोकेन्द्र र विशाललाई जेठ ८ गते बिहान पक्राउ गरिएको हाे।
पक्राउ परेका तीनै जनाविरुद्ध ज्यान मार्ने उद्योगको कसुरमा जिल्ला अदालत ललितपुरबाट ५ दिनको म्याद लिएर अनुसन्धान सुरु गरिएको प्रहरीले जानकारी दिए।