बजेट सीमा साढे ८६ अर्ब घटाए पनि पूँजीगत खर्च ९० प्रतिशत हुने अर्थमन्त्रीको भनाई

समाचार शेयर गर्नुहोस्

सरकारले अर्धवार्षिक मूल्याङ्कन क्रममा चालू आर्थिक वर्ष २०७८/७९ को बजेट सीमा ८६ अर्ब ५५ करोड रुपैयाँले घटाएको छ । प्रतिस्थापन विधेयकमार्फत १६ खर्ब ३२ अर्ब ८३ करोड रुपैयाँ बराबरको बजेट ल्याएको सरकारले बजेट आकार १५ अर्ब ४६ अर्ब २८ करोड रुपैयाँ हुनेगरी संशोधन गरेको हो । स्रोत व्यवस्था, खर्च अवस्था र सरकारी दायित्व लगायत पक्षलाई मध्यनजर गरी सरकारले हरेक आर्थिक वर्षमा बजेट आकार संशोधन गर्ने गर्छ ।

संशोधित बजेट आकार शुरू विनियोजनको करिब ९४.७ प्रतिशत हुने अर्थ मन्त्रालयले जानकारी दिएको छ । तर, बजेट सीमा संशोधन भएपनि स्थानीय तह निर्वाचन खर्च, कोभिड–१९ विरुद्धको खोप लगायतको खर्च, रासायनिक मल खरिद, बेमौसमी वर्षाले पीडित धान किसानलाई क्षतिपूर्ति, अनिवार्य दायित्व र पूर्व सहमति दिइएका ठूला आयोजनाको सम्भावित दायित्वलाई भने कम नगरिएको अर्थमन्त्री जनार्दन शर्मा ‘प्रभाकर’ ले बताए ।

यसअघि तीन खर्ब ८७ अर्ब १० करोड रुपैयाँ पूँजीगत खर्च गर्ने लक्ष्य राखेको सरकारले अब तीन खर्ब ४० अर्ब ३२ करोड अर्थात विनियोजित बजेटको ९०.०१ प्रतिशतमात्र हुने जनाएको छ । यस्तै, असार मसान्तसम्म चालू खर्च १० खर्ब ३५ अर्ब ४६ करोड रुपैयाँ अर्थात विनियोजनको ९७.२ प्रतिशत हुने अनुमान गरेको छ । वित्तीय व्यवस्थातर्फ एक खर्ब ७० अर्ब ४९ करोड रुपैयाँ अर्थात विनियोजनको ९० प्रतिशत हुने अर्थ मन्त्रालयको अनुमान छ ।

चालू आर्थिक वर्षमा राजस्वको नेपाल सरकारको स्रोत अर्थात राजस्व र आन्तरिक ऋणबाट १२ खर्ब ८९ अर्ब ८२ करोड, वैदेशिक अनुदानतर्फ ५० अर्ब र वैदेशिक ऋणतर्फ दुई खर्ब ६ अर्ब ४६ करोड खर्च हुने संशोधित अनुमान गरिएको छ । राजस्व संकलन भने लक्ष्यअनुसार नै हुने मन्त्रालयको अनुमान छ ।

Leave a Reply

Your email address will not be published. Required fields are marked *

ताजा समाचार
सर्वाधिक रुचाईएको