१२ सय ४० जनाले मात्र पीसीएल नर्सिङमा भर्ना पाउने

समाचार शेयर गर्नुहोस्

काठमाडाैं
प्राविधिक शिक्षा तथा व्यावसायिक तालिम परिषद् (सीटीईभीटी)ले आफ्नै १०० संख्याको अस्पताल भएका नर्सिङ कलेजमा मात्रै भर्ना खोलेको छ,३३ वटा नर्सिङ कलेजमा १ हजार २ सय ४० जनाले चालु शैक्षिक सत्रमा प्रमाणपत्र तह (पीसीएल) नर्सिङ पठनपाठन गर्न पाउनेछन् ।

त्यसका लागि सीटीईभीटीले सञ्चालन गर्ने प्रवेश परीक्षामा सशभागी हुनुपर्छ । यसअघि आफ्नै अस्पताल नभएका नर्सिङ कलेजमा पनि भर्ना लिने निर्णयबाट सरकार पछि हटेपछि सीटीईभीटीले मापदण्ड पुगेका शिक्षण संस्थामा भर्नाका लागि आवेदन आह्वान गरेको हो ।

चिकित्सा शिक्षा ऐनले संशोधन गरेर भएपनि सम्बन्धन पाएका सबै नर्सिङ कलेजमा नर्सिङ पढाइ हुने बताएका थिए । आफ्नै अस्पताल भएका कलेजकाे भर्ना पनि रोकेर राखिएको थियो । मन्त्रिपरिषद् बैठकले ऐनको व्यवस्था संशोधन संसद्मा प्रस्ताव लैजाने निर्णयसमेत गरेको थियो । तर चिकित्सा शिक्षा सुधारका अभियन्ताहरूको विरोधपछि मापदण्ड बदल्ने निर्णयबाट पछि हटेको हो । मापदण्ड पूरा गरेका नर्सिङ कलेजमा मात्रै भर्ना खोलिएको सीटीईभीटीका प्रवक्ता विनोद बडालले जानकारी दिए ।

पीसीएल नर्सिङ पढाउन १ सय ९ वटा कलेजले अनुमति पाएका छन् । ऐनले तोकेअनुसार अस्पताल नभएका कारण अधिकांश कलेज गत शैक्षिक सत्रदेखि नै बन्द छन् । थोरै कलेजले मात्रै नर्सिङ पठनपाठन गराउने हुँदा सीमित विद्यार्थीले मात्रै पढ्ने अवसर पाउँछन् । गत वर्ष पनि करिब १ हजार २ सय विद्यार्थीले मात्रै नर्सिङ पढ्ने अवसर पाएका थिए । ऐनको व्यवस्था लागू हुनुअघि १ सय ९ कलेजमा ४ हजारभन्दा बढी विद्यार्थीले नर्सिङ पढ्थे । सरकारले आंगिक कलेजमा नर्सिङ अध्यापनको व्यवस्था मिलाउन र सय बेडको अस्पताल भएका स्वास्थ्य संस्थालाई नर्सिङ पढाउने अनुमति दिनुको साटो नर्सिङ नै संशोधन गर्ने चलखेल गर्दै आएको छ । त्यसका मारमा विद्यार्थी परेका छन् ।

सरकारले प्रत्येक प्रदेशमा सरकारी मेडिकल कलेज स्थापना गर्ने लक्ष्य लिएको छ । तर सीटीईभीटीले खुलाएको भर्नाअनुसार सुदूरपश्चिम र कर्णाली प्रदेशमा एउटा शिक्षण संस्थाले पनि नर्सिङ पढाउन पाउँदैनन् । ३३ मध्ये २/२ वटा आंगिक र साझेदारी शिक्षण संस्था छन् भने अन्य निजी हुन् । सबैभन्दा धेरै वाग्मती प्रदेशका ११ वटा निजी कलेजमा ४ सय जनाले नर्सिङ पढ्न पाउँछन् । ९ वटा कलेजमा ४० जनाको दरले, महेन्द्रनारायण निधि मेमोरियल हेल्थ इन्स्टिच्युट काठमाडौं र च्छोरोल्पा जनरल अस्पताल चरिकोट दोलखाले २०/२० जना नर्सिङ पढाउन अनुमति पाएका छन् । मधेस प्रदेशमा २ वटा आंगिक र ८ वटा निजी गरी ३ सय ६० कोटामा नर्सिङ पठनपाठन हुनेछ । प्रदेश १ मा एउटा साझेदारी र ४ वटा निजी कलेजमा २ सय जनाले नर्सिङ पढ्न पाउँछन् । गण्डकी प्रदेशका ४ निजी कलेजमा १ सय ६० जना र लुम्बिनी प्रदेशका ३ कलेजमा १ सय २० जनाले नर्सिङ पढ्ने अवसर पाउँछन् ।

सरकारले नर्सिङ विषय अध्यापनका लागि दायित्व नलिएकाले अहिलेको अवस्था आएको चिकित्सा शिक्षा सुधारका अभियन्ता डा. जीवन क्षत्रीले बताए । ‘सय बेडको अस्पताल नभएका कलेजलाई अस्पताल बनाउन राज्यले सहजीकरण गर्नुपर्छ,’ उनले भने, ‘राज्यले आफ्नो दायित्व बढाए विद्यार्थीले पढ्न नपाउने अवस्था आउँदैन ।’ नर्सिङको कार्यक्रम सञ्चालन गर्न अनुमति पाएका निजी कलेजले सरकारी र अन्य अस्पतालमा विद्यार्थीलाई प्रयोगात्मक अभ्यास गराउँदै आएका थिए । एउटै अस्पतालमा धेरै कलेजका विद्यार्थीको अभ्यास गराउनुपर्ने अवस्था थियो । गुणस्तरीय स्वास्थ्य जनशक्ति उत्पादनमा जोड दिँदै नर्सिङ पढाउन आफ्नै १०० बेडको अस्पताल चाहिने स्नातकर प्रमाणपत्र तहमा एउटै शिक्षण संस्थाले नर्सिङ पठनपाठन गराउन नपाउने व्यवस्था ऐनले गरेको छ । चालु शैक्षिक सत्रमा सीटीईभीटीले नर्सिङ पढ्न ४ लाख ७५ हजार शुल्क तोकेको छ ।

Leave a Reply

Your email address will not be published. Required fields are marked *

ताजा समाचार
सर्वाधिक रुचाईएको