काठमाडाैं, १० साउन
लुम्बिनी प्रदेशमा लम्पी स्किन रोगबाट पाँच हजार ८९ पशु मरेका छन् । त्यस्तै एक लाख १८ हजार पशु सङ्क्रमित भएका छन्।८८ हजार नौ सय ८४ सङ्क्रमित पशुकाे उपचार भैरहेको लुम्बिनी प्रदेश पशुपन्क्षी निर्देशनालयले जनाएकाे छ। बाँकी निको भएका छन् ।
थप पशु सङ्क्रमित हुन नदिन प्रदेश सरकारले जिल्लाका सबै स्वस्थ पशुलाई लम्पी स्किन विरुद्धको खोप लगाउन शुरु गरेको छ । प्रदेश कृषि तथा पशुपक्षी मन्त्रालयले साउन ४ गतेदेखि सबै जिल्लामा खोप पठाएर लगाउन थालेको निर्देशनालयका निर्देशक डा परबेज आलमले जानकारी दिनुभयाे ।
अहिले प्रदेश सरकारले आकस्मिक कोषको बजेटले खोप खरिद गरेर जिल्लामा पठाएको बताउँदै अबको व्यवस्थापनको लागि पाँच करोड रुपैयाँ माग गरिएको जनाएको छ । लुम्बिनीमा लम्पी स्किनको प्रकोपले पछिल्लो तीन महिनामा किसानले करोडौँ रुपैयाँको नोक्सान व्योहोरेका छन् ।
