नेपालमा सामग्री खोज्ने प्रमुख माध्यम बन्दै टिकटक

टिकटकका अनुसार नेपाली प्रयोगकर्ता वास्तविक जीवनसँग सम्बन्धित प्रश्नको उत्तर खोज्न यस माध्यमतर्फ आकर्षित भइरहेका छन् । सिकाइ, यात्रा, पुस्तक र खानासँग सम्बन्धित विषयमा खोजको संख्या उल्लेखनीय रूपमा बढेको टिकटकले जनाएको छ ।

संवेदनशील विषय खोज्दा प्रयोगकर्तालाई विश्वसनीय र सहयोगी स्रोततर्फ मार्गदर्शन गरिने व्यवस्था गरिएको छ । मानसिक स्वास्थ्य सहायता, प्राकृतिक प्रकोप, गलत जानकारी तथा सार्वजनिक सुरक्षासँग सम्बन्धित विषयमा यस्ता हस्तक्षेप लागू गरिएको टिकटकले जनाएको छ ।

टिकटक दक्षिण एसियाकी विश्वास तथा सुरक्षा प्रमुख आस्मा अन्जुमले खोज सुविधा सुरक्षालाई केन्द्रमा राखेर विकास गरिएको बताइन् । उनका अनुसार संवेदनशील विषय खोज्दा प्रयोगकर्तालाई तथ्यपरक, जिम्मेवार र हितकारी मार्गदर्शन प्रदान गरिन्छ ।

दक्षिण एसियाभर टिकटकलाई खोज गन्तव्यका रूपमा प्रयोग गर्ने प्रवृत्ति बढ्दै गएको टिकटकको दाबी छ । सरल, दृश्यात्मक र प्रामाणिक जानकारीको माग बढिरहेका बेला टिकटकले नयाँ प्रविधि, सुरक्षा संरचना र स्थानीय सहकार्यमा लगानी बढाउँदै खोज सुविधालाई भविष्यमा पनि सामग्री खोज्ने प्रमुख माध्यमका रूपमा विकास गर्ने जनाएको छ ।