ओलीले भने– सरकारले विमानस्थलमा दुःख दियो, अपमान गर्‍यो

अस्ति म यताबाट झापा जाँदा मलाई अलि राम्रै व्यवहार गरेको थियो, एयरपोर्टहरूमा । हिजो फर्केर आउँदा केके न सुन तस्कर हुँ कि जस्तो गरेर चेकिङ गरेको छ, के गरेको छ । हैरान पारेको छ । अचम्मै, त्यो विदेश जाँदाखेरि कहिले कहिले, त्यो विदेश जाँदा पनि चिनेको ठाउँहरूमा हामीलाई त्यस्तो गर्दैन । नचिनेको ठाउँमा परियो भने देखिन्छ नेपालीहरूलाई हेपेको । हिजो एयरपोर्टमा त्यस्तै गरेर हेप्यो । किन त्यस्तो गरेको भन्दा माथिबाट आदेश आएको छ भन्छ । यो सरकार के गर्दै छ भन्दा बेथिति भइराखेको छ, अन्याय भइराखेको छ, बेठिक भइराखेको छ, तर सरकार हामीलाई दुःख दिने काममा लागिराखेको छ । अपमान गर्ने काममा लागिराखेको छ । हामी आफ्नै सम्मानका लागि लडिरहेको होइन, देशको सम्मानका लागि, जनताको सम्मानका लागि, जनताको इज्जतको लागि लडिराखेको छौँ । त्यसकारण त्यो धेरै ठूलो कुरा मान्दिनँ म । तर, सरकारको दृष्टिकोण, सरकारको मतिचाहिँ के हो ? नेताहरूको अपमान गर्ने हो नि ! त्यो सरकारले हिजै देखायो । कस्तो लाग्यो भने, एउटा सभ्य समाजमा हामी छैनौँ कि जस्तो लाग्यो । एउटा जिम्मेवार सरकार होइन, अराजनीतिक, असभ्य सरकार छ । यी सबै कुराहरू हामीले फेरि सभ्य, सुसंस्कृत समाजमा ल्याउनुपर्नेछ । त्यो सबै कुरा चुनावको फैसलाबाट देखिन्छ ।