काठमाडौं । राष्ट्रपति रामचन्द्र पौडेलसमक्ष संयुक्त अधिराज्य बेलायती सेनाका मेजर जेनरल जेरल्ड एम स्ट्रिकलेन्डसहितको टोलीले गोर्खा बिग्रेडको वार्षिक प्रतिवेदन प्रस्तुत गरेको छ ।
त्यस अवसरमा राष्ट्रपति पौडेलले अन्तर्राष्ट्रिय मञ्चहरूमा नेपाल र संयुक्त अधिराज्यले विकास, मानवकल्याण र शान्तिसँग सम्बन्ध राख्ने विषयमा सहकार्य गर्दै आएको र दुवै राष्ट्रले राष्ट्रसंघीय शान्ति सेनामार्फत विश्वशान्ति स्थापनाबारे समान धारणा राखिरहेको उल्लेख गरे ।
उनले नेपाल र संयुक्त अधिराज्यबीच सदियौँदेखि घनिष्ठ सम्बन्ध रहिआएको बताए । एक महत्त्वपूर्ण विकास साझेदार समेत रहेको संयुक्त अधिराज्यले नेपाललाई निरन्तर पुर्याउँदै आएको सहयोगप्रति उनले धन्यवाद व्यक्त गरे ।
उनले ब्रिटिस गोर्खाले आफ्नो प्रशंसनीय कार्यका माध्यमबाट नेपाल र बेलायतबीच द्विपक्षीय सम्बन्ध थप मजबुत बनाएकामा खुसी व्यक्त गरे । संयुक्त अधिराज्यमा नेपालीको उपस्थितिले दुई देशबीच रहिआएको जनस्तरको सम्बन्ध थप सुदृढीकरण भएको आफूहरूको ठम्याइ रहेको उनले उल्लेख गरेका राष्ट्रपतिको स्वकीय सचिवालयले जनाएको छ ।
उनले पूर्वब्रिटिस गोर्खाका केही जायज गुनासा सम्बोधन गर्न कूटनीतिक तहमा छलफल भइरहेको र यो विषय द्विपक्षीय संयन्त्रका माध्यमबाट छिट्टै टुंगोमा पुर्याउन उचित हुने आफूलाई लागेको बताए ।
गोर्खा बिग्रेडको सन् २०२५ को वार्षिक प्रतिवेदन प्रस्तुत गरेकामा उनले संयुक्त अधिराज्य सरकारलाई धन्यवाद व्यक्त गरे । प्रतिवेदनउपर सम्बन्धित निकायले आवश्यक अध्ययन गर्ने उनले जानकारी गराए ।
त्यस अवसरमा बेलायती सेनाका मेजर जेनरल जेरल्ड एम स्ट्रिकलेन्डले ब्रिटिस गोर्खा सेना सधैँ अग्रपंक्तिमा रहेको बताउँदै प्रशंसा गरे । ब्रिटिस गोर्खामा भर्ना भएका युवालाई ‘तपाईंहरू नेपालका छोराछोरी हो’ भनेर आफूले सम्झाउने गरेको उनले बताए । बेलायती जनताले गोर्खा नेपालीप्रति माया र सम्मान प्रकट गर्ने गरेको उनले उल्लेख गरे ।
त्यस अवसरमा नेपालस्थित बेलायती राजदूत रव फेनको पनि उपस्थिति थियो ।
