विराटनगर । खोटाङको जन्तेढुंगा गाउँपालिका-६ दिप्लुङस्थित निगालबासमा सामूहिक झाडापखालाको प्रकोप देखिएको छ । स्थानीय विवाह भोजमा सहभागी व्यक्तिहरूमा एकैसाथ झाडापखाला, वान्ता, ज्वरो तथा टाउको दुखाइका लक्षण देखापरेपछि स्वास्थ्य निकाय सतर्क बनेका छन् ।
गत माघ २१ गते आयोजित एक विवाह कार्यक्रममा करिब दुई सय ५० जना सहभागी थिए ।
सोही कार्यक्रमा गएर भोज खाएका व्यक्तिहरूमध्ये पहिलो बिरामी माघ २२ गते राति १ बजे चिसापानी प्राथमिक स्वास्थ्य केन्द्रमा उपचारका लागि पुगेका थिए ।
प्रारम्भिक चरणमै चारदेखि सात जनामा उल्टी, झाडापखाला र पेट दुख्ने समस्या देखिएपछि पालिकाको द्रुत प्रतिक्रिया टोली सक्रिय गरिएको थियो ।
बिरामीको संख्या क्रमशः बढ्दै एकसय जनासम्म पुगेपछि स्वास्थ्यकर्मीहरू घर-घरमै पुगेर उपचारमा खटिएका थिए ।
सोही दिन जिल्ला स्तरीय द्रूत प्रतिक्रिया टोली पनि परिचालन गरिएको थियो ।
उपचारमा खटिएका स्वास्थ्यकर्मी योगेश कटुवालले भने, ‘विवाह भोज खाएकामै यस्ता लक्षण देखिएका छन् । अहिले पनि कतिपय स्थानीय स्वास्थ्य जाँचका लागि आइरहनुभएको छ । फुड पोइजन भएर यस्तो भएको हो ।’
घटनाको जानकारी प्राप्त भएपछि कोशी प्रदेश स्वास्थ्य मन्त्रालय, जन्तेढुंगा गाउँपालिका तथा चिसापानी प्राथमिक स्वास्थ्य केन्द्रका चिकित्सकसहितको टोली घटनास्थल पुगेर अनुगमन तथा प्रारम्भिक अनुसन्धान गरेको थियो ।
कोशी प्रदेशका स्वास्थ्य मन्त्री मानबहादुर राई स्वयं घटनास्थल पुगेर अवस्थाबारे जानकारी लिँदै बिरामीहरूको उपचारमा कुनै कसर बाँकी नराखिने बताएका छन् ।
हाल अधिकांश बिरामीको अवस्थास्थिर रहँदै क्रमशः सुधारोन्मुख रहेको स्वास्थ्यकर्मीहरूले जनाएका छन् ।
घटनाको विस्तृत कारण पत्ता लगाउन नमुना संकलन गरी प्रदेश जनस्वास्थ्य प्रयोगशालामा कल्चर परीक्षणका लागि पठाइएको बताइएको छ ।
