रविले चितवनबाट सहकारी ठगेको प्रमाण मागे, पोखरामा पीडितले गगनलाई विज्ञप्ति बुझाए

‘ममाथि प्रमाण छ भनिएको ६५८ दिन भएछ । चाहिएन प्रमाण भइगयो । मेरो अन्तिम इच्छा सोधेको पनि धेरै दिन भएछ । म चितवनबाट भन्छु मेरो अन्तिम इच्छा फागुन २१ गते देखाइदिनु होला,’ उनले भने । संयोग यस्तो भयो कि लामिछानेले थापासँग प्रमाणको खोजी गर्दै गर्दा उनी पक्राउ परेको पोखराको सूर्यदर्शन सहकारी पीडितहरुले थापालाई बचत फिर्ताको माग गर्दै ज्ञापनपत्र बुझाएका छन् ।

नेपाली कांग्रेसले पोखरामा आयोजना गरेको आमसभाका क्रममा सहकारी पीडितहरूले थापालाई भेटेर रकम फिर्ताको पहल गरिदिन आग्रह गरेका हुन् । उनले इमानदार बचतकर्ताको रकम इमानदारिका साथ फिर्ता हुनुपर्ने माग गरे । सरकारमा वा जुनसुकै भूमिकामा रहे पनि सहकारी पीडितको समस्या समाधानका लागि पहल गरिदिन थापालाई आग्रह गरिएको श्रेष्ठले सुनाए ।

‘हामीलाई काँग्रेस, एमाले, माओवादी वा रास्वपा कसले गर्दिएनन् भन्ने पीर होइन । हामीलाई सबैभन्दा ठूलो पीर जसले खाएको हो, उसले फिर्ता गरेन भन्ने हो,’ सहकारीका पीडित संघर्ष समिति संयोजक किरण श्रेष्ठले भने, ‘सहकारीको रकम हिनामिना गर्नेहरू कोही कारागारमा छन् । कोही कोही खुलामञ्चमा भाषण गर्दै हिँडिरहेको र कोही नेता बनेर हिँडिरहेको अवस्था छ ।’

लामिछाने विरुद्धको मुद्दामा कास्की जिल्ला अदालतले ६५ लाख धरौटीमा छोड्ने आदेश दिएको थियो । लामिछानेले सूर्यदर्शन सहकारीको ३ करोड ३७ लाख ६५ हजार रुपैयाँ अपचलन गरेको भन्दै उनीविरुद्ध सोही रकमबराबर बिगो माग दाबी गरेर सरकारी वकिल कार्यालयले अदालतमा मुद्दा दायर गरेको थियो । विज्ञप्ति बुझेपछि थापाले यसअघि पनि आफूहरु पीडितको पक्षमा रहेको र सँधै संगै रहने प्रतिबद्धता जनाए।