दार्चुलामा बेवारिसे पुरूषकाे शव फेला

शनिबार बिहान साढे ८ बजेको समयमा महाकाली नगरपालिका –५ नमस्कारस्थित महाकाली नदीको बीच भागमा ढुङ्गामा अड्किएको अवस्थामा एक पुरुषको शव फेला परेको हो ।

जिल्ला प्रहरी कार्यालय दार्चुलाबाट खटिएको प्रहरी टोलीले अन्दाजी ३०/३५ वर्षको पुरुषको शव महाकाली नदीबाट निकाली शवको मुचुल्कासहितको प्रारम्भिक अनुसन्धान कार्य पूरा गरेको र ती पुरुषको शव जिल्ला अस्पताल दार्चुलाको शव गृहमा राखिएको जानकारीका साथ हालसम्म शवको सनाखत हुन नसकेको जिल्ला प्रहरी कार्यालय दार्चुलाका सूचना अधिकारी ज्ञानेन्द्रबहादुर सिंहले जानकारी दिनुभयो ।

मृतकको ट्र्याकको खल्तीमा अन्जनी टुर एण्ड ट्राभल्स (टनकपुर, महेन्द्रनगर, बरेली, हल्द्धानी, हरिद्वार, देहरादुन, दिल्ली) लेखेको भिजिटिङ कार्ड फेला परेको छ । थप जानकारीका लागि जिल्ला प्रहरी कार्यालयको मोबाइल नम्बर ९८५८७८३५५५ मा सम्पर्क गर्न सरोकारवालालाई प्रहरीले अनुरोध गरेको छ ।