‘प्रधानमन्त्रीले राष्ट्रपतिलाई असंवैधानिक काम गर्न उक्साउनु आफैंमा गम्भिर विषय हो’: योगेश भट्टराई

सरकारले विधेयक प्रमाणीकरण गर्न राष्ट्रपतिलाई अनुरोध गर्ने निर्णय संसदको अधिकारमाथिको हस्तक्षेप भन्दै उनले असंवैधानिक कामका लागि राष्ट्रपतिलाई नउक्साउन आग्रह गरेका हुन्।

पूर्वमन्त्रीसमेत रहेका भट्टराईले सामाजिक सन्जालमा लेखेका छन्, ‘प्रधानमन्त्रीलाई राष्ट्रपतिको सल्लाहकारका रुपमा पनि बुझिन्छ । स्वयं प्रधानमन्त्रीले राष्ट्रपतिलाई असंवैधानिक काम गर्न उक्साउनु आफैंमा गम्भिर विषय हो ।भट्टराईले विधेयक प्रमाणीकरणका लागि राष्ट्रपतिलाई सिफारिस गर्ने अधिकार मन्त्रिपरिषद्लाई नभएको बताएका छन्।

सरकारले नागरिकता विधेयक प्रमाणीकरणका लागि राष्ट्रपति कार्यालयमा पत्र पठाएको सम्बन्धमा टिप्पणी गर्दै भट्टराईले संविधानको कुनैपनि धाराले मन्त्रिपरिषद्लाई विधेयक प्रमीकरणको सिफारिस गर्ने अधिकार नदिएको बताएका हुन्।

संविधानको धारा ११४ अनुसार अध्यादेशको हकमा मात्र त्यो अधिकार सरकारलाई रहने उनको भनाइ छ। भट्टराईले संसद जारी रहेको अवस्थामा सरकारले ल्याउने विधेयक संसदमा पेश गर्नुपर्ने बताए ।