कागजात शंकास्पद देखिएपछि कुवेत जान लागेका १२६ जना श्रमिकलाई विमानस्थलबाट फर्काइयो

सुवेदीले भन्नुभयो, ‘श्रम स्वीकृति लिएर गएका भए पनि अन्य कागजात शंकास्पद देखिएपछि उनीहरुलाई फर्काइएको हो’ ‘कसैको करारपत्रमा कम्पनीको एउटा नाम र श्रम स्वीकृतिमा अर्कै नाम पनि देखियो यस्तै देखाउने भिसा एउटा र झोलामा अर्कै भिसा भएका पनि देखिए ।’

उहाँका अनुसार बुधबार बेलुकी ९८ जना र बिहीबार बिहान २८ जना गरी जम्मा एक सय २६ जनालाई कुवेत जानबाट रोकिएको हो । उनीहरुमध्ये अधिकांश महिला रहेको सुवेदीले बताउनुभयो ।

अध्यागमनले उनीहरुलाई घरेलु कामदारको रुपमा जान लागेको आशंका गरेको छ । घरेलु श्रमिकका रुपमा कुवेतमा जान मिल्दैन । तर विभिन्न म्यानपावर कम्पनीहरुले झुटा विवरण पेस गरेर घरेलु कामदारमा पठाउन खोजेको भन्ने सूचनाका आधारमा अध्यागमनमा कडाइ गरिएको सुवेदीले बताउनुभयो ।

अध्यागमन विभाग र वैदेशिक रोजगार विभागले थप अनुसन्धान गरी यसरी श्रमिक पठाउने म्यानपावर कम्पनीमाथि थप कारबाही अगाडि बढाइने पनि उहाँले बताउनुभयो ।