चितवनबाट समानुपातिकमा कांग्रेस, एमाले र माओवादीले पाए सांसद्

दुवैजना पार्टीमा हाल केन्द्रीय सदस्य हुन् । दलित मुक्ति अभियानमा सक्रिय शान्ति हाल नेपाल दलित संघ चितवनकी अध्यक्षसमेत हुन् । संविधानसभा सदस्यसमेत रहेकी अञ्जनी भने बागमती प्रदेशका बहालवाला मन्त्री मिलनबाबु श्रेष्ठकी पत्नी हुन् । उनी विद्यार्थी राजनीतिबाट पार्टीमा लागेकी व्यक्ति हुन् । सांसद् बनेका दुवैजना नेतृ पार्टी सभापति शेरबहादुर देउवानिकटका मानिन्छन् ।

संघीय संसद्मा दोस्रो दल बन्न सफल नेकपा एमालेबाट भने पार्टी उपाध्यक्ष रामबहादुर थापा (बादल) पत्नी नैनकला थापा सांसद् बनेकी छन् । तर, पार्टीको केन्द्रीय समितिले नैनकला रुपन्देहीबाट सांसद् बनेको बताएको छ । चितवन जिल्ला अध्यक्ष रामप्रसाद न्यौपानेले भने चितवन जिल्लाबाट सिफारिस भएकोले चितवन जिल्लाकै सांसद् भएको दाबी गरेका छन् ।

भरतपुर महानगरपालिका वडा नं–१० घर भएकी थापा हाल केन्द्रीय सल्लाहकार परिषद् सदस्य हुन् । उनको राजनीतिक पृष्ठभूमि भने नेकपा माओवादी केन्द्र हो । माओवादी र एमाले समीकरण भएर बनेको नेकपापछि पार्टी पुरानै ठाउँमा आए पनि थापा परिवार भने माओवादीमा फर्किएनन्, एमालेमा बसेका थिए ।

संघमा तेस्रो दल बनेको नेकपा माओवादी केन्द्रबाट भने तीन जना समानुपातिक सांसद् बनेका छन् । पार्टीको पोलिटब्युरो सदस्य ज्ञानु बस्नेत सुवेदी, केन्द्रीय सदस्य रणेन्द्र बराली र अखिल क्रान्तिकारीका केन्द्रीय उपाध्यक्ष कल्पना मियाँ सांसद् बनेका हुन् ।

पार्टीको चितवन जिल्ला अध्यक्ष रामचन्द्र अधिकारी (आरसी)का अनुसार माओवादी केन्द्रबाट समानुपातिक सांसद् बनेकी नेतृ सुवेदी पार्टीमा सबैभन्दा पुरानो नेतृ हुन् । जाजरकोट माइत भई हाल भरतपुर–१५, फूलबारी घर भएकी ज्ञानु माओवादी नेता सूर्य सुवेदी (पथिक)की श्रीमती र मन्त्रीसमेत भइसकेका माओवादी नेता शक्ति बस्नेतकी बहिनी हुन् । करिब २०५५/५६ सालदेखि नै पार्टीमा लागेकी ज्ञानुले २०६२/०६३ सालताका धादिङमा पार्टी इन्चार्ज भएर काम गरेकी थिइन् ।

सर्वहारा श्रमिक संगठनबाट रानजीतिमा प्रवेश गरेका पुराना नेता रणेन्द्र बराली पनि यसपटक चितवनबाट प्रतिनिधिसभामा सांसद् बनेका छन् । उमेरले प्रचण्ड समूहकै व्यक्ति बराली हाल पार्टीको केन्द्रीय सदस्य हुन् । पञ्चायतकालदेखि नै राजनीतिमा सक्रिय उनी दलित क्लस्टरबाट सांसद् बनेका हुन् । अखिल क्रान्तिकारीका केन्द्रीय उपाध्यक्ष कल्पना मियाँ भने राजनीतिक यात्राको सुरूवाती चरणमै सांसद् बन्न सफल भएकी छन् ।

रूकुम पश्चिम घर भए पनि चितवनको रत्ननगर माइती भएकी कल्पना मुस्लिम महिला तथा पिछडा वर्गबाट चितवनको प्रतिनिधित्व गर्दै संघीय सांसद् बनेकी हुन् । चितवनबाट सांसद् बन्नेमा कांग्रेसकी अञ्जनी श्रेष्ठबाहेक सबै नयाँ अनुहार हुन् ।

प्रदेशमा चितवनबाट पाँच जना

प्रदेशमा नेपाली कांग्रेसबाट विनु रायमाझी पौडेल, गीता गुरूङ र माया श्रेष्ठ सांसद् बनेका छन् । भरतपुर–१० की विनु र भरतपुर–२६ की गीता दुवै महाधिवेशन प्रतिनिधि हुन् । भरतपुर–३ की माया भने क्षेत्रीय प्रतिनिधि हुन् । नेपाली कांग्रेसको भातृ संगठन नेपाल तरूण दलबाट राजनीतिक यात्रा सुरू गरेकी विनु तरूण दलका तत्कालीन अध्यक्ष स्वर्गीय शिव पौडेल पत्नी हुन् ।

गीता गुरूङ पनि नेपाली कांग्रेसको राजनीतिमा सक्रिय योद्धाको रुपमा परिचित छिन् । पटकपटक महाधिवेशन प्रतिनिधि हुँदै आएकी उनी पहिलोपटक संसद् प्रवेश गरेकी नेतृ हुन् । कांग्रेसको राजनीतिक यात्रा र आन्दोलनमा विशेष भूमिकामा देखिएकी माया श्रेष्ठले पनि पहिलोपटक सांसद् बन्ने मौका पाएकी हुन् ।

नेकपा एमालेबाट भने केन्द्रीय सल्लाहकार परिषद् सदस्य हरिप्रसाद सापकोटाले सांसद् बन्ने मौका पाएका हुन् । भरतपुर–६ घर भएका सापकोटा माधवकुमार नेपाल महासचिव हुँदा चितवन जिल्लामा सचिव भएर पार्टी नेतृत्व सम्हालेका व्यक्ति हुन् । त्यतिखेर केन्द्रमा महासचिव र जिल्लामा सचिव नै पार्टी प्रमुख हुने प्रावधान थियो । हाल पार्टीको केन्द्रीय समितिमा अनुशासन आयोगको सचिव रहेका सापकोटा नेकपा कालमा केन्द्रीय सदस्य थिए ।

नेकपा माओवादी केन्द्रबाट ईश्वर सापकोटा (सुमन) सांसद् बनेका छन् । जनयुद्धमा प्रत्यक्ष सहभागी भई युद्धकै क्रममा आँखा गुमाएका सापकोटा हाल पार्टीको भरतपुर महानगरपालिका अध्यक्ष हुन् । माओवादी केन्द्र चितवनका अध्यक्ष अधिकारीका अनुसार नेता सापकोटा विसं २०५६ सालदेखि नै पार्टीमा सक्रिय छन् । राष्ट्रिय प्रजातन्त्र पार्टी (राप्रपा) र राष्ट्रिय स्वतन्त्र पार्टी (रास्वपा)ले प्रदेशमा पनि चितवनबाट सांसद् पाएनन् । रास्वपाको कुनै पनि प्रदेशमा उमेदवार नभएकोले प्रदेश सांसद् पाउने कुरै भएन ।