ओलीलाई विगत १० वर्षमा प्रस्तुत भएका बजेट आयोग बनाएर समीक्षा गर्न जनार्दनकाे चुनाैती

आगामी आर्थिक वर्षका लागि प्रस्तुत बजेटमाथि शुक्रबार प्रतिनिधिसभामा बोल्दै सांसद शर्माले राजनीतिक पूर्वाग्रह राखेर ओलीले चालू बजेटलाई शून्य अंक दिएको बताए ।

उनले भने ‘चालु आर्थिक वर्षको बजेट समीक्षा गर्दै पूर्वप्रधानमन्त्री समेत रहेका विपक्षी दलका नेता केपी शर्मा ओलीले शून्य मार्क दिनुभयो । उहाँको मूल्याङ्कन सत्ताबाट विमुख हुनुपर्दाको पूर्वाग्रह र प्रतिशोधपूर्ण भएको मैले बुझेको छु । म यहाँ कुनै दोहोरी खेल्न चाहन्न । म यो बुझ्छु कि बजेट जनताको हितमा हुनुपर्छ । ताकि जनताको जीवनमा परिवर्तन आओस् । त्यसैले बजेटको बस्तुनिष्ठ मूल्याङ्कन गर्नुपर्छ भन्ने मेरो मान्यता रहेको छ । देशको भविष्य र जनताको जीवनसँग सरोकार राख्ने बजेटलाई राजनीतिक चस्माबाट समीक्षा गरियो भने त्यसले ठिक निष्कर्ष निस्किँदैन । आग्रह र पूर्वाग्रह नराखी बजेटको समीक्षा गरौँ।’