बालेन, गगन थापा र केपी ओलीबिच ‘लाइभ’ बहसको माग, एउटै मञ्चबाट जनताका प्रश्नको जवाफ दिन दबाब

सञ्चारकर्मी टीकाराम यात्रीले सामाजिक सञ्जालमार्फत तीनै जनालाई खुला बहसका लागि आह्वान गरेका छन् । उनले लेखेका छन्, “नेपाली काङ्ग्रेसले गगनकुमार थापा, नेकपा एमालेले केपी ओली र राष्ट्रिय स्वतन्त्र पार्टीले बालेन्द्र शाहलाई औपचारिक रूपमै भावी प्रधानमन्त्रीको उमेदवार बनाएकाले देश निर्माणका लागि यहाँहरूका ठाेस नीति, योजना र कार्यक्रमसहित साझा बहसका लागि यहाँ तिनै जनालाई हार्दिक आह्वान गर्दछौं ।” यस्तो बहसले सही पात्र छनौट गर्न मतदातालाई मद्दत गर्ने यात्रीको विश्वास छ ।

त्यस्तै हिमालय टेलिभिजनको कार्यक्रम ‘यक्ष प्रश्न’ का प्रस्तोता निमेष बन्जाडेले पनि ओली, थापा र शाहलाई एउटै मञ्चमा आउन खुला निमन्त्रणा दिएका छन् । उनले सामाजिक सञ्जालमा लेखेका छन्, “तपाईंहरूका देश बनाउने योजना सुन्न र नेपाली जनतालाई सुनाउन चाहन्छौँ । सभ्य र भव्य बहसका लागि हार्दिक निमन्त्रणा ।” यता काङ्ग्रेसका सहमहामन्त्री उदयशम्शेर राणाले तीनै जनालाई खुला बहसमा सहभागी बनाउनुपर्ने प्रस्ताव राखेका छन् ।

यसअघि एमाले अध्यक्ष ओली र कांग्रेस सभापति थापाले विभिन्न सञ्चार माध्यममा अन्तरवार्तामा सहभागिता जनाउँदै आएका छन् । तर, बालेनले भने पछिल्लो समय मूलधारका सञ्चार माध्यमसँगको संवादमा दूरी बनाएका छन् । बालेनले सञ्चार माध्यमलाई अन्तरवार्ता दिनुपर्ने माग गर्दै यसअघि ‘पेटिसन’ समेत चलाइएको थियो ।

सामाजिक सञ्जालमा उठेको यो मागलाई लिएर सर्वसाधारणले ‘वेस्टर्न डेमोक्रेसी’ मा हुने ‘प्रेसिडेन्सियल डिबेट’ जस्तै नेपालमा पनि शीर्ष नेताबिच प्रत्यक्ष प्रश्नोत्तर हुनुपर्ने धारणा राखेका छन् । हालसम्म तीनै पक्षबाट यस विषयमा कुनै औपचारिक प्रतिक्रिया भने आएको छैन ।