प्रधानमन्त्री मात्र होइन, ‘भावी गृहमन्त्री म हो’ भन्दै भोट माग्दै उम्मेदवारहरु

यता दर्जनौं दल र समूह मिलेर बनेको नेपाली कम्युनिष्ट पाटी केही नबोलेपनि संयोजक पुष्पकमल दाहाल प्रचण्डले भावी प्रधानमन्त्रीमा आफूलाई उभ्याएका छन् ।

नेपालको संविधान अनुसार प्रधानमन्त्री हुन र मन्त्रीहरु हुनको लागी चुनाव जित्नु पर्ने कानुनी प्रावधान रहेको छ, सोही आधारलाई लिएर पनि चुनाव जित्न र मतदातालाई प्रभाव पार्न नेताहरु भावी प्रधानमनत्री र मन्त्रीको रवाफ दिँदै चुनावी मैदानमा रहेका छन् । २१ फागुन पछि आउने निर्वाचन परिणमका आधारमा को हुन्छ त्यो भने हेर्न बाँकी नै छ ।

भावी प्रधानमन्त्री त राजनीतिक दलहरुले अघि सारेर चुनावमा जाने विगत देखिकै अभ्यास हो । आफैंलाई आफैं मन्त्री हुन्छु र काम गर्छु भन्दै भोट मागिरहेकाहरु चुनाव जित्छन् र मन्त्री बन्छन् की चुनाव जितेर पनि मन्त्री बन्न सक्दैनन् वा चुनावै नजित्ने हुन् त्यो अहिलेसम्म कसैलाई पत्तो छैन।

केही दिनअघि नेकपा (एमाले)का सचिव तथा भक्तपुर २ का एमाले उम्मेदवार महेश बस्नेतले बागमती प्रदेश स्तरिय कार्यक्रममा सम्बोधन गर्दै चुनाव पछि एमाले अध्यक्ष केपी शर्मा ओली प्रधानमन्त्री बन्ने र त्यसपछि गृहमन्त्री को बन्छ तपार्इंहरुलाई थाहै होला भन्दै आफू गृहमन्त्री बन्ने संकेत दिए । यति मात्र होइन, आफू गृहमन्त्री बनेपछि बालेन शाह, रवि लामिछाने, जेनजी आन्दोलनको विध्वंस गर्नेलाई कार्वाही गर्ने बताएका थिए । एमालेमा उनी ओलीका विश्वास पात्रका रुपमा चिनिन्छन । झापा ५ वाट उम्मेदवार बनेका अध्यक्ष ओली र बस्नेत दुवै जनाले चुनाव जिते र एमालेको नेतृत्वमा सरकार बने यो सम्भव हुन पनि सक्ला तर दुवैलाई चुनावमा रास्वपाका प्रभावशाली नेताहरुले टक्कर दिएका छन् ।

त्यस्तै, रास्वपाबाट भावी प्रधानमन्त्रीका रुपमा अगाडि सरेका बालेनले ताप्लेजुङको पाथीभरा मन्दिरको दर्शन गरेर पूर्वहुँदै सुदूरपश्चिम, कर्णालीमा चुनावी अभियान तीव्र पारेका छन् । ओलीलाई टक्कर दिन झापा पुगेका बालेन चुनाव जिते रास्वपाबाट प्रधानमन्त्री बन्नेछन् । उनी प्रधानमन्त्री भए आफू उनको विश्वास पात्र रहेको र विगतमा पनि संगै काम गरेका आधारमा आफू गृहमन्त्री बन्ने दाबी राजु पाण्डेले गरेका छन् । बालेन मेयर रहँदा उनी महानगर प्रहरी प्रमुख रहेका थिए । हाल उनी पनि राजीनामा दिएर काठमाडौं क्षेत्र नम्बर ३ मा रास्वपाबाट उम्मेदवार बनेका छन् । उज्यालो पार्टीका अध्यक्ष कुलमान घिसिङ, नेपाली कांग्रेसका रमेश अर्याल र एमालेका रामेश्वर फुँयाललाई पराजित गरेर संसद प्रवेश गर्नु पाण्डेका लागि आफैंमा फलामको चिउरा चपाए सरह हुनेछ ।

पाण्डे जस्तै रास्वपाबाट ओखलढुंगामा उम्मेदवार वनेका नेपाल प्रहरीका पूर्वडिआईजी विश्वराज पोखरेलमा पनि गृहमन्त्रीकै चाह देखिन्छ । केही दिनअघि सञ्चारमाध्यमसँग कुरा गर्दै पोखरेलले आफ्नो योग्यता क्षमता, अनुभवका आधारमा रास्वपा सरकारमा गए आफू गृहमन्त्री बन्ने संकेत गरेका छन् ।