म पुराना नेताहरूको भिडमा छैन, सत्ताको भागबन्डामा सहभागी हुन चाहन्नँ : प्रचण्ड

‘एउटा मान्छेले आफ्नो जीवनमा जे जे गुमाउन सक्छ, मैले ती सबै गुमाएँ । तर, मलाई अझै पनि के कुराले अगाडि बढ्न प्रेरित गर्छ भने, यो संघर्ष मेरो व्यक्तिगत होइन । यो त ती हजारौँ सहिदहरूको सपना पूरा गर्ने यात्रा हो, जसले एउटा सुन्दर र समृद्ध नेपालका लागि आफ्नो रगत बगाए । मलाई थाहा छ मेरो परिवार र मेरा कमरेडहरूको यो बलिदान खेर जानेछैन । परिवर्तन अनिवार्य छ र म यो सुनिश्चित गर्नेछु कि त्यो परिवर्तन भएरै छाड्नेछ ।’

युवाहरूले माग गरेको भ्रष्टाचारको अन्त्य, पारदर्शीता र बलियो सरकार युद्धका दिनदेखि नै आफूले उठाउँदै आएको उनले बताएका छन् । राजनीतिक स्थिरता र विकासका लागि प्रत्यक्ष निर्वाचित कार्यकारी प्रमुखको व्यवस्था हुनुपर्नेमा उनको जोड छ ।

‘यो संसदीय खेल र कुर्सीको तानातानले देशलाई कति पछाडि धकेल्यो, त्यो हामी सबैले देखेका छौँ, भोगेका छौँ । त्यसैले म भन्छु, मेरो माग र तपाईँहरूको माग एउटै हो। म तपाईँहरूकै पुस्ताको सोच बोकेर हिँडेको यात्री हुँ ।’

‘या त तिमी नायकको रूपमा मर, या त आफूलाई खलनायक बनेको हेर्न जीवित रहु’ उक्ति सम्झिँदै प्रचण्डले भने, ‘यदि म धेरै अघि बिदा भएको भए सायद देशले मलाई नायकको रूपमा मात्र सम्झिन्थ्यो होला । तर, म खलनायक बनेर इतिहासको पानामा हराउन चाहन्नँ । म यो देशलाई सही दिशामा नपुर्‍याएसम्म विश्राम लिने छैन । तपाईँहरूले मलाई आज कुन रूपमा देख्नुहुन्छ, यो तपाईँहरूको स्वतन्त्रता र अधिकारको कुरा हो। तर मेरो अभावमा मेरो उपस्थितिको महसुस तब हुनेछ, जब तपाईँहरूले मैले कोरेका परिवर्तनहरूलाई भोग्नुहुनेछ। म हार मान्न तयार छैन किनकि मेरो काम अझै सकिएको छैन ।’

नयाँ पुस्तालाई सधैँ स्वागत गर्ने भन्दै प्रचण्डले हरेक चम्किलो चिज हीरा नहुने बताएका छन् ।

उनको भनाइ छ, ‘आजको यो डिजिटल युगमा सामाजिक सञ्जालका भ्रमहरूले तपाईँहरूलाई बहकाउन सक्छन् । कसैले तपाईँहरूलाई सानो महसुस गराउन नदिनुहोस् । म यहाँ तपाईँहरूसँग भोट माग्न आएको होइन, म त तपाईँहरूलाई स्वतन्त्र चिन्तनको लागि अपिल गर्न आएको हुँ । प्रश्न सोध्न नछोड्नुहोस्, म त्यसको जवाफ दिन तयार छु।’