फेरि उठेको प्रश्न– एसोसियट र टेस्ट राष्ट्रबीचको भिन्नता के ?

तर अहिले विषय प्रशंसाको होइन, प्रगतिको हो । अङ्कको हो ।

दुई पटकको विश्व च्याम्पियन इंग्ल्यान्डविरुद्ध जितको छायासम्ममा पुगेर नेपालले बहादुरी देखाएकै हो । क्रिकेट विश्वलाई आफूतिर पुन: आकर्षित गरेकै हो । र, नेपाल एसोसियटको बलियो राष्ट्र हो भन्ने छविलाई पुष्टि गरेकै हो ।तथापि वास्तविकता यो पनि हो कि अन्ततः नेपालको हातमा शून्य अङ्कमात्र छ ।

विश्लेषकहरू भन्छन्, “टेस्ट राष्ट्रका खेलाडीहरू जित्न जान्छन् । भिन्नता भनेको यही नै हो ।”

अनुमान गरौँ यही स्थितिमा यदि नेपालले बलिङ गरिरहेको होस् र इंग्ल्यान्डले ब्याटिङ गरिरहेको भए सहजै १० रन जोड्न सक्थ्यो।

एसोसियटको चुनौती

२० राष्ट्र सहभागी रहेको जारी टी-२० विश्वकपमा ९ एसोसियट राष्ट्र छन् । यिनीहरूले विगतको विश्वकपमा पनि केही अप्रत्याशित नतिजा त निकालेका छन् । तर त्यो कुनै एकाध खेलमा सीमित हुने गरेको छ, ठुलो धक्का दिन सकेको देखिएको छैन ।

यसपालि विश्वकप सुरु भएको २ दिनमा नै तीनवटा एसोसियट राष्ट्रले प्रभाव देखाइसकेको छ । अमेरिकाले भारतसँग र नेदरल्यान्ड्सले पाकिस्तानविरुद्धको खेलमा एक समय टेस्ट विपक्षीलाई दबाबमा पारेको थियो । त्यसो भए के एसोसियट र टेस्ट टोली बराबर हुन थालेको हो ?

यही प्रश्न इंग्ल्यान्डका खेलाडी विल ज्याक्सलाई खेलपछिको पत्रकार सम्मेलनमा सोधिएको थियो ।

ज्याक्सले कम्तीमा छोटो फर्म्याटको क्रिकेटमा बराबरको अवस्थामा आइसकेको स्वीकार गरे । उनले भने, “ हो, सेतो बलको क्रिकेटमा यो दुरी निकै साँघुरिइसकेको छ ।”

यद्यपि साँघुरिइरहेको यो खाडलको दूरी यति छ कि यसले अधिकांश समय एसोसियट राष्ट्रलाई जितबाट रोकिरहेको छ ।

५० ओभरको खेल र त्यो भन्दा माथि टेस्ट खेलबाट यी राष्ट्रका खेलाडीहरू यति खारिइसकेका हुन्छन् कि उनीहरू खेलको हरेक कठिन परिस्थितिलाई आरामसँग नियन्त्रण गर्न सक्छन् ।

अन्तिम ओभरमा बलिङ गर्न आएका शाम करन कति दबाबमा थिए होला त्यो अनुमान गर्न सकिन्थ्यो ।

तर उनले आफ्ना कप्तान ह्यारिस ब्रुकलाई विश्वस्त पार्दै भनेका थिए, “म ६ वटा योर्कर फ्याल्दै छु ।” उनले फ्यालेर पनि देखाए ।

विषय जति गहन भए पनि जवाफ भने उतिकै सहज पनि छ । नेपालले अब इन्टेन्स क्रिकेट खेल्न जरुरी छ । नेपाली खेलाडीहरू सक्षम छन् भन्ने कुरामा द्विविधा रहेन ।

तर नेपालले ठुला देशहरूसँग कति पटक खेल्ने मौका पाउँछ त ? २०२४ मा दक्षिण अफ्रिकासँग १ रनले हारेपछि नेपालले २ वर्षको बीचमा त्यस्तै स्तरको टोलीसँग कतिपटक क्रिकेट खेल्ने मौका पायो त ?

हेक्का राख्नुपर्ने कुरा के हो भने अन्तर्राष्ट्रिय क्रिकेट यात्रा सुरु गरेको तीन दशकपछि नेपालले बल्ल पहिलोपटक इंग्ल्यान्डसँग खेल्ने मौका पाएको हो ।

एसोसियट राष्ट्रको हैसियतले नेपालले ठुला टोली भेट्न विश्वकप नै पर्खिनुपर्ने अवस्था छ । तर अहिले कीर्तिपुर रंगशाला अन्तर्राष्ट्रियस्वरुप लिइसकेकोले यस्ता मौकाहरु बनिरहने आशा गरौँ । नेपाल क्रिकेट संघले यो कुरा राम्ररी बुझेको पनि छ ।