कांग्रेस नेतृत्वमा सरकार बन्छ, योजना र उपलब्धि सार्वजनिक गर्छौंः सभापति थापा

उनले संविधान निर्माणमा शुसिल कोइरालाले बनाएको मार्गदर्शनलाई उदाहरण दिँदै भने, ‘संविधानको राजमार्गमा कही कतै नरोकी सबैलाई लिएर गाडी बेजोड तरिकाले दौडाउँछौं । गतिमा दौडिन्छ तर दुर्घटना हुँदैन । जोखिम लिन र स्पीड कायम राख्न अनुभव आवश्यक छ, र त्यो अनुभव हामीसँग छ ।’

थापाले ०४६ यताका सबैको सम्पत्तिको छानबिन आवश्यक रहेको उल्लेख गर्दै भने, ‘आफ्नै घरको सदस्य भए पनि कसैले छुटकारा पाउने छैन ।’ संविधानमा उल्लेखित विषयहरू पूर्णरूपमा कार्यान्वयन गर्ने र स्वास्थ्य बीमा कार्यक्रमलाई पुनः व्यवस्थित गर्ने प्रतिज्ञासमेत गरे । उनले कांग्रेसले संकल्पसहित अघि बढेको भन्दै पार्टीको कमजोरीलाई सफा गर्ने र राम्रो कामको जिम्मा लिन तत्पर रहेको बताए ।

‘सरकार बनेपछि मासिकरूपमा कार्य प्रस्तुत गर्नेछौं र महिनाको अन्त्यमा उपलब्धि सार्वजनिक गरिनेछ,’ उनले आश्वस्त पारे ।

सभापति थापाले नयाँ युगको राजनीतिमा कांग्रेसलाई प्रवेश गराउने योजना प्रस्तुत गर्दै, ‘धैर्यता, सुझबुझ, विवेक र चेतना कांग्रेससँग छ । सबैको अधिकारको विषयमा सबैलाई साथमा लिएर काम गरिनेछ,’ भने । उनले पार्टीभित्र सामान्य मनमुटाव भए पनि त्यसबीचमा सँगसँगै अघि बढ्ने पनि बताए ।

उनले आगामी पाँच वर्षलाई ‘सुशासनको वर्ष’ बनाउने प्रतिबद्धता व्यक्त गर्दै भने, ‘यो समय घृणा वा प्रतिशोधको होइन, विकास, सहकार्य र समुन्नतको वर्ष हुनेछ ।’ कांग्रेसले जनताको आवश्यकता, पूर्वाधार निर्माण, रोजगारी सिर्जना र सामाजिक सुरक्षामा विशेष ध्यान दिने उनको भनाइ छ । थापाको सम्बोधनले जनतामा आगामी निर्वाचन र विकासमुखी कार्ययोजनाप्रति उत्साह र अपेक्षा जगाएको छ । उनले आफ्नो योजनाहरूमा पारदर्शिता, जिम्मेवारी र गति कायम राख्ने वचन दिँदै, स्थानीय निर्वाचन क्षेत्रका सबै तहमा जनसरोकार र सहभागिता सुनिश्चित गर्ने प्रतिबद्धता दोहोर्‍याए ।