एक करोड श्रमदाता जुटाएर देश बदल्ने हर्क साम्पाङको उद्घोष

ठुलो संख्यामा नागरिकको श्रम परिचालन गर्न सके मात्र विकासले गति लिने विश्वास व्यक्त गर्दै उनले एक करोड मानिसका दुई करोड हात एकैसाथ चल्दा मुलुकमा ठूलो परिवर्तन आउने दाबी गरे। श्रमदानले केवल भौतिक निर्माण मात्र नभई व्यक्तिको शरीर बलियो बनाउने, समाजलाई भावनात्मक रूपमा जोड्ने र समग्र मुलुकलाई समृद्धिको दिशामा लैजाने उनको तर्क छ।

सरकारले स्रोत र साधन भएर पनि गर्न नसकेका कतिपय कामहरू नागरिकको स्वस्फूर्त श्रमदानबाट सम्भव हुने उदाहरण दिँदै उनले दार्चुलामा श्रमदानमार्फत पुल निर्माण गर्ने तयारी भइरहेको जानकारी समेत दिए। राज्य संयन्त्र सुस्त रहेको अवस्थामा श्रम शक्तिले नै विकासको नेतृत्व गर्नुपर्ने भन्दै उनले कुरा गरेर मात्र देश नबन्ने र काममा जुट्न सबैलाई आह्वान गरे।

श्रम र पसिनाको सम्मान गर्ने संस्कृतिले मात्रै नेपाललाई आत्मनिर्भर बनाउन सकिने उनको भनाइ छ।