कुमारी बैङ्क लिमिटेडको २५ औँ वार्षिकोत्सव

वार्षिकोत्सवकै अवसरमा बैङ्कले परम्परा र सांस्कृतिक सम्पदाको महत्वलाई उजागर गर्न “परम्परागत भेसभुसा” पहिरन गरी वार्षिक उत्सव सम्पन्न गरेको छ। यस कार्यक्रमले कर्मचारीहरूलाई आफ्नो जातीय पृष्ठभूमि प्रतिनिधित्व गर्ने पोसाक मार्फत सांस्कृतिक पहिचान गर्न मद्दत पुर्‍याएको छ। विविध सांस्कृतिक परम्परालाई अङ्गाल्दै, बैङ्कले आफ्नो कार्य शक्तिमा समावेशिता र सम्मानलाई बढवा दिएको छ। यस पहल मार्फत, बैङ्कले “सबैका लागि साधैका लागि” भन्ने मूल उद्देश्य भित्र रही आन्तरिक आबद्धताको भावनालाई बढवा दिन, कर्पोरेट संस्कृति र सामुदायिक कार्यलाई निरन्तरता दिएको छ।

यसका साथै बैङ्कले आफ्ना सम्पूर्ण शाखाहरू मार्फत संस्थागत सामाजिक उत्तरदायित्वका कार्यहरू देशै भरि वर्षै भरि गर्न “समुदायका लागि कुमारी बैङ्क” कार्यक्रमको थालनी गरेको छ। यस कार्यक्रम मार्फत समुदायका गरिब, विपन्न तथा पिछडिएका वर्गहरूको जीवन स्तर सहज बनाउन बैङ्कले आफ्ना सम्पूर्ण शाखाहरूबाट निरन्तर प्रयास गर्ने बैङ्कले जनाएको छ।

साथै, बैङ्कले आफ्नो रजत जयन्तीको अवसरमा सिल्भर सेभिङ्गस् बचत खाता पनि सार्वजनिक गरिसकेको छ जसमा ग्राहकहरूले बचत खातामै मुद्दती खाताको जस्तो ब्याजदर पाउनेछन्।

विगत २५ वर्ष देखि निरन्तर बैङ्किङ सेवा दिँदै आएको कुमारी बैङ्कले आफ्ना देशभर रहेका २८६ शाखा सञ्जाल, ३०२ एटिएम, ४१ एक्सटेन्सन काउन्टर तथा ४८ शाखा रहित बैङ्किङ इकाईहरू मार्फत आफ्ना तिस लाखभन्दा बढी ग्राहकवर्गहरूलाई अत्याधुनिक तथा प्रभावकारी सेवाहरू प्रदान गर्दै आइरहेको छ र आगामी दिनहरूमा पनि अझ सरल, सुलभ तथा उत्कृष्ट सेवाका निमित्त सहकार्यहरू गर्दै जाने समेत प्रतिबद्धता जनाएको छ।