मोटरसाइकल चोरीमा संलग्न तीन पक्राउ

कल्याणपुर (सप्तरी), चैत २० गते । सप्तरी प्रहरीले मोटरसाइकल चोरी घटनामा संलग्न तीन जना युवालाई पक्राउ गरेको छ । पक्राउ पर्नेहरुमा राजविराज नगरपालिका वडा १० का १९ बर्षीय शिवनन्दन यादव, वडा नम्बर ४ का १९ बर्षीय सञ्जु यादव र सोही वडाका १९ वर्षीय मो. अफताव रहनु भएको हो ।

प्रहरीका अनुसार बिहीबार राति राजविराज नगरपालिका वडा नम्बर ३ स्थित पोखरेल टोल जाने बाटोमा स्थानीय लालबाबु ठाकुरको घर अगाडि पार्किङ गरी राखिएको मोटरसाइकल चोरी भएको थियो। चोरीपछि करिब पाँचसय मिटर टाढा लगेर मोटरसाइकलको तार सर्ट गरी लैजाँदै गरेको अवस्थामा प्रहरी गस्ती टोलीले शंका लागि जाँच गर्ने क्रममा तीनै जनालाई नियन्त्रणमा लिएको जिल्ला प्रहरी कार्यालय सप्तरीका प्रहरी नायब उपरीक्षक डम्बरबहादुर पुरीले जानकारी दिनुभयो ।