उत्खननको तेस्रो दिनमा डेढ वर्षअघि सिमलताल दुर्घटनामा परेका दुई बसमध्ये गणपति डिलक्सको बस नै रहेको पुष्टि भएको हो ।
चितवन — डेढ वर्षअघि चितवनको भरतपुर–२९, सिमलतालस्थित त्रिशूली नदीमा हराएका दुई वटा बसमध्ये एउटा गणपति डिलक्सको बस फेला परेको छ ।
आइतबार बिहान बसको अवशेष फेला परेपछि उत्खननको सुरु गरिएको थियो । उत्खननको तेस्रो दिनमा डेढ वर्षअघि सिमलताल दुर्घटनामा परेको बस नै रहेको पुष्टि भएको हो । तीन दिनदेखि निरन्तर उत्खनन गर्दा मंगलबार सशस्त्र प्रहरी बलको टोलीले गणपति डिलक्स रहेको फला पारेको हो । उनले अझै उत्खनन कार्य भइरहेको बताए ।
चितवनका प्रमुख जिल्ला अधिकारी गणेश अर्यालले गणपति डिलक्स नै रहेको पुष्टि भएपछि खोजी कार्यलाई थप निरन्तरता दिइने बताए ।
दुर्घटनामा परेकामध्ये केहीको मात्रै शव फेला परेको थियो । बस र यात्रु खोज्न नेपाली सेना र सशस्त्रका गोताखोरसहित वाटर ड्रोन (सोनार) तथा प्रहरीसहित खोजीमा पाँच सय सुरक्षाकर्मी खटिएका थिए । सरकारले थप खोजीका लागि भारतबाट उच्च प्रविधिसहितको गोताखोरसमेत ल्याएको थियो । तर बस फेला पर्न सकेको थिएन ।
