चन्द्र नयाँ वर्षको उत्सवका बीच चीनमा भएको भीषण पटाका विस्फोटमा १२ जनाको मृत्यु भएको छ ।
मध्य हुबेई प्रान्तको जिनपु गाउँस्थित आतसबाजी पसलमा बुधबार दिउँसो विस्फोट भएको हो ।
चाइना सेन्ट्रल टेलिभिजनका अनुसार गहन खोजी तथा उद्धारपछि सात वयस्क र पाँच बालबालिकासहित १२ जनाको मृत्यु पुष्टि भएको छ ।
पसलका मालिक बाहेक अन्य सबै ग्राहक थिए, जसमध्ये केही ७८० किलोमिटर टाढाको चेङ्दुबाट आएका थिए ।
घटनाबारे अनुसन्धान सुरु गरिएको छ ।
यसैबीच, पाकिस्तानको कराचीस्थित एक आवासीय भवनमा ग्यास चुहावटका कारण भएको विस्फोटमा ६ जनाको मृत्यु र १२ जना घाइते भएका छन् ।
उद्धार टोलीले भग्नावशेषबाट पीडितहरूको उद्धार गर्दै थप खोजी जारी राखेको जनाएको छ ।
