‘पुटिनलाई पक्राउ गर्नुहुन्छ’ भन्ने प्रश्नमा ट्रम्पले के भने ?

जवाफमा ट्रम्पले भने, “मलाई लाग्दैन त्यस्तो गर्नु आवश्यक हुन्छ । पुटिनसँग सधैं राम्रो सम्बन्ध रहँदै आएको छ । तर, म धेरै निराश छु ।”

ट्रम्पले युक्रेन–रुस युद्ध अन्त्य गर्न आफूले प्रयास गरिरहेको भए पनि सम्झौता गर्न कठिन भइरहेको गुनासो गरे । “मैले आठवटा युद्ध समाधान गरिसकेको छु,” उनले दाबी गरे, “मलाई लाग्थ्यो यो मध्यम वा सजिलोमध्ये पर्छ, तर अहिले पनि समस्या छ । पछिल्लो एक महिनामा मात्र ३१ हजार मानिसको ज्यान गएको छ, जसमा धेरै रुसी सैनिक छन् । रुसी अर्थतन्त्र पनि कमजोर अवस्थामा छ ।”

उनले युद्ध अन्त्य हुनेमा आशावादी रहेको बताउँदै भने, “अन्ततः यो समाधान हुन्छ भन्ने मलाई लाग्छ । अझ चाँडो गर्न सकिएको भए राम्रो हुन्थ्यो, किनकि धेरै मानिसहरू मरिरहेका छन् ।”

रुसले २०२२ मा युक्रेनमाथि आक्रमण गरेपछि सुरु भएको युद्ध अझै जारी छ । ट्रम्पले चुनावी अभियानमै यो युद्ध अन्त्यलाई प्राथमिकता बनाउने बताएका थिए ।