जुम्लामा सरकारी सम्पत्तिको चरम दुरुपयोग भएको घटना बाहिर आएको छ । सरकारी नम्बर प्लेटको मोटरसाइकल (बाइक) गुडाउने व्यक्ति नै मादक पदार्थ सेवन (मापसे) गरेको अवस्थामा भेटिएपछि राज्य संयन्त्रभित्रको लापरबाही र गैरजिम्मेवारी देखिएको छ ।
आइतबार साँझ जिल्ला ट्राफिक कार्यालय जुम्लाले नियमित मापसे चेकजाँच गर्ने क्रममा क१ब १८६ नम्बरको बाइक नियन्त्रणमा लिएको थियो । प्रत्यक्षदर्शीका अनुसार उक्त बाइकमा सवार व्यक्ति मादक पदार्थ सेवन गरेर लर्बराएको अवस्थामा थिए । ट्राफिक प्रहरीले आवश्यक कारबाही स्वरूप जरिबाना तिराएर छाडे पनि घटनाले गम्भीर प्रश्न उठाएको छ ।
सरकारी बाइकमा मापसे गरेर सडकमा हुइँकिने व्यक्ति को हुन् भन्ने खुल्न सकेको छैन । उक्त बाइक कुन कार्यालयको हो भनेर सोध्दा सवार व्यक्तिले ‘मलाई थाहा छैन’ भन्ने जबाफ दिएका छन् ।
सरकारी नम्बर प्लेट भएको सवारी चलाउने व्यक्तिलाई नै स्रोत र जिम्मेवारीबारे जानकारी नहुनु आफैँमा शङ्कास्पद देखिन्छ । सरकारी सवारी साधन निजी प्रयोजनमा प्रयोग हुनु नौलो होइन, तर मापसे गरेर सडकमा कुदाउनु भनेको राज्यकै सम्पत्तिको चरम दुरुपयोगमात्र होइन, प्रचलित कानुनको ठाडो उल्लङ्घन पनि हो ।
