पाठक पत्र:रास्वपाले कसरी पूरा गर्ला जनअपेक्षा ?

भदौ २३ र २४ गतेको घटनाबारे छानबिन गरेर पूर्वन्यायाधीश गौरीबहादुर कार्की नेतृत्वको आयोगले प्रधानमन्त्री सुशीला कार्कीलाई प्रतिवेदन बुझाइसकेको छ । सो प्रतिवेदनमा रास्वपाबाट चुनाव जितेर आएका कतिपय सांसदलाई पनि कारबाही सिफारिस गरिएको समाचार बाहिर आइरहेको छ । यसैले रास्वपाको दबाबमा प्रधानमन्त्री कार्कीले प्रतिवेदन सार्वजनिक नगरेको अनुमान पनि गरिन्छ । त्यसैले अब मुलुकमा झन् संकट आउने हो कि ?

अब छिमेक भारत र चीनसँगको हाम्रो सम्बन्धमा पनि दरार आउन सक्छ । किनकि रास्वपामा पश्चिमी (अमेरिका) मुलुकको प्रभुत्व रहेको आरोप छ । अमेरिकाले रास्वपालाई प्रयोग गरेर चीन र भारतलाई प्रभावमा पार्ने रणनीति बनाएको हल्ला छ । नेपालमा अमेरिकी सेना पस्नेबित्तिकै भारत र चीन दुवैले नाकाबन्दी नगर्लान् भन्न सकिन्न । यसो हुनेबित्तिकै नेपालमा संकट उत्पन्न हुन्छ ।

अर्को मुख्य कुरा, देश विकास गर्न अनि जनअपेक्षा पूरा गर्न पैसा चाहिन्छ, राज्यको ढुकुटी भरिपूर्ण हुनुपर्छ, जुन केही वर्षयता रित्तो हुँदै गएको छ । राजस्व उठ्नमा पनि ओरालो लागेको अवस्था भएकाले रास्वपाले कसरी जनअपेक्षा पूरा गर्छ ? कसरी देश विकास गर्छ ?

मुलुक अहिल्यै ऋणैऋणमा छ । वैदेशिक ऋण ३२ खर्ब पुगिसक्यो । निर्माण व्यवसायीको ४५ अर्ब, कोरोना बिमाको २४ अर्ब, स्वास्थ्य बिमाको ४३ अर्ब र दुग्ध तथा उखु किसानको ७ अर्ब भुक्तानी दिन बाँकी छ । सरकारी दैनिक खर्च नै करोडौं छ । एकातिर राजस्व नउठ्ने, अर्कोतिर खर्चको चाङ, अब रास्वपाले कसरी गर्छ काम ? हेर्न बाँकी छ ।