काठमाडौं। अखिल नेपाल फुटबल संघ (एन्फा)लाई राष्ट्रिय खेलकुद परिषद् (राखेप)ले तीन महिनाका लागि निलम्बन गरेको छ । एन्फाले राखेपले दिएको ११ बुँदे निर्देशन पालना नगरी माघ २८ गते झापामा अर्ली इलेक्सन गर्ने निर्णय गरेपछि विवाद चर्किएको थियो।
राखेपले नियमावलीअनुसार निर्वाचन प्रक्रिया नचलाएको भन्दै एन्फासँग स्पष्टीकरण माग गरेको थियो। तर प्राप्त जवाफ चित्त बुझ्दो नभएको निष्कर्ष निकाल्दै बुधबार बसेको कार्यकारी समितिको बैठकले निलम्बन गर्ने निर्णय गरेको हो। यससँगै निलम्बन अवधिभर एन्फाले कुनै पनि फुटबल गतिविधि सञ्चालन गर्न पाउने छैन।
निलम्बन फुकुवा गर्न राखेपले दिएको निर्देशन र सर्तहरू पूरा गर्नुपर्नेछ। पछिल्लो समय अर्ली इलेक्सन घोषणा, आन्तरिक विवाद र अदालतसम्म पुगेका विषयले नेपाली फुटबलको प्रशासनिक पक्षमा गम्भीर प्रश्न उठाउँदै आएको छ।
यस घटनाले मैदानभित्रको खेलभन्दा बाहिरको प्रशासनिक विवाद बढी चर्चामा आएको देखिएको छ, जसले नेपाली फुटबलको भविष्यबारे फेरि बहस सुरु गरिदिएको छ।
