माडीमा अवरूद्ध हुलाकी सडक र पुल निर्माण कार्य अगाडि बढाउन निर्माण व्यवसायीहरु तयार भएका छन् । माडी नगरपालिकाको आयोजना र नगरप्रमुख ताराकुमारी काजी महतोको संयोजनमा नगर कार्यपालिका कार्यालयमा सम्पन्न बहुपक्षीय बैठकबाट पुल र हुलाकी सडक निर्माण कार्य अगाडि बढाउन सहमति जुटेको हो । सहमतिअनुसार निर्माण पक्षले पुस २५ गतेभित्र निर्माण कार्य सुचारू गर्ने र असार मसान्तभित्रै निर्माण कार्यहरु पूरा गर्ने सहमति भएको नगरप्रमुख महतोले बताइन् ।

बैठकमा चितवन राष्ट्रिय निकुञ्जका प्रमुख संरक्षण अधिकृत हरिभद्र शर्मा, विद्युत् प्राधिकरण चनौली शाखाका प्रमुख शिशिर लम्साल तथा हुलाकी सडक आयोजना कार्यालयका उच्च अधिकारीहरु एवं पुल र सडक निर्माणको ठेक्का लिएका निर्माण व्यवसायीहरु सहभागी थिए। त्यस्तै क्रियाशील राजनीतिक दल, समृद्धिका लागि युवा अभियान माडी, मिडिया र नगरपालिकाका जनप्रतिनिधिहरुको समेत सहभागिता थियो ।

संघ र प्रदेशको चुनावदेखि निर्माण व्यवसायीहरुले विभिन्न बहानामा काम रोकेको र केही सडकको म्यादसमेत यही असार मसान्तमा सकिन लागेको बताउँदै मेयर महतोले निर्माण व्यवसायीको सहजताका लागि निकुञ्जले सहयोग गर्ने र काम तत्काल सुरू गर्ने सहमति भएको बताइन् ।

ढुङ्गा, गिटीलगायतका निर्माण सामग्रीको रोयल्टी र उत्खनन प्रक्रियाका विषयमा कुरा नमिल्दा योजना प्रभावित हुन पुगेको दाबी छ । हुलाकी राजमार्ग योजना कार्यालय वीरगन्जका प्रमुख सिनियर डिभिजन इन्जिनियर दारोगा प्रसाद निर्माण सामग्री ल्याउने र लैजाने विषयमा कुरा नमिल्दा काममा ढिलाइ भएको जिकिर गर्छन् ।

केही दिनअघि युवा अभियान माडीका युवाहरुको एक समूहले ठेक्का लिएर काम नगर्ने ठेकेदारको तस्बिरसहित ठेकेदार हराएको सूचना ठाउँ–ठाउँमा टाँसेका थिए । हुलाकी राजमार्गअन्तर्गत जीवनपुरदेखि बगईसम्मको सडक र पतरे खोलाको पुल निर्माणको जिम्मा लिएका ठेकेदारहरु हराएको भन्दै फोटोसहितको सूचना टाँसिएको थियो ।

निर्माण सामग्रीको अभावमा काम रोकिएको निर्माण व्यवसायी तुलसी घिमिरे बताउँछन् । चितवन राष्ट्रिय निकुञ्जले निर्माण सामग्री ल्याउन नदिएकोमा अब भने राजस्व तिरेर नदीजन्य पदार्थ ल्याउन दिनका निम्ति निकुञ्ज सहमत भएको छ । उनले तत्कालै काम सुरू गर्ने र असार मसान्तभित्रै काम सक्ने बताए ।

हुलाकी राजमार्ग योजना कार्यालय वीरगन्जले हेर्ने भरतपुर–माडी–ठोरी सडकअन्तर्गत पर्छ । जीवनपुर–बगई ८.८ किलोमिटर सडकखण्ड निर्माणको जिम्मा बज्रगुरू र ढुकुचु जेभीले पाएको थियो । आगामी असार मसान्तसम्म निर्माण सम्पन्न गर्नुपर्ने सडकको काम अहिले ठप्प छ । निकुञ्जभित्र पर्ने सडक र जीवनपुरदेखि बगईसम्मको सडक भने लामो समयदेखि अलपत्र रहेको थियो ।

चितवनको माडी नगरपालिकामा निर्माणाधीन सडक तथा पुलहरुको काम ढिलो गरेको भन्दै ठेकेदार हराएको सूचना टाँस्ने अभियान चलाइएको छ । समृद्धिका लागि युवा अभियान माडीमा आबद्ध युवाहरुले ठेकेदारसहितको तस्बिर सडकछेउछाउमा टाँगेका छन् ।

भरतपुर–माडी–ठोरीअन्तर्गतको हु्लाकी राजमार्गमा पर्ने जीवनपुरदेखि बगईसम्मको सडक र पतरे खोलाको पुल निर्माण ढिला भएको भन्दै ध्यानाकर्षण गराएका थिए । ठेकेदारहरु सम्पर्कविहीन भएकाले खोजीका लागि ठेकेदार हराएको भन्दै ब्यानर टाँगिएको अभियन्ता रामचन्द्र लम्सालले बताए । म्याद थप हुँदासमेत काम पूरा नभएपछि स्थानीय युवाहरु मिलेर दबाब दिइएको उनले बताए ।

पिच भत्काइएपछि सडक धुलाम्मे छ । निर्माणाधीन जीवनपुर–बगई सडक ८.८ किलोमिटरको छ । बज्रगुरू र ढुकुचु जेभीले आगामी असार मसान्तसम्म निर्माण सक्ने गरी जिम्मा लिएका थिए । तर, अहिले काम रोकिएको छ ।

अभियन्ता कृष्ण पौडेलले निकुञ्जको बहाना बनाएर निर्माण व्यवसायीले पटकपटक म्याद थप्न खोजेको आरोप लगाए । माडीको हुलाकी सडकमध्ये १५.५ किलोमिटर सडक कालोपत्रे बनिसकेको छ ।

पतरे खोलाको निर्माणको जिम्मा लोहनी एण्ड ब्रदर्शले लिएको थियो । पतरे खोलाको काम पनि अहिले ठप्प छ । माडीको मुख्य सडकमा १२ पुल छन् । चितई, रिमाल र टुनामुना खोलाकोे पुल तयार भैसकेको छ । रिउ खोला, लम्बाइ खोला, घाँघर खोला, परूई खोला, भालु खोला, बाँदरमुढे, रतनी खोला, मुगई खोला पुल बन्दैछन् । माडीको हुलाकी सडकको निर्माणको काम निगरानी गर्ने कार्यालय हुलाकी राजमार्ग योजना कार्यालय वीरगन्जमा छ ।