सर्वोच्च अदालतले राष्ट्रिय स्वतन्त्र पार्टी (रास्वपा) सभापति रवि लामिछाने विरुद्धको मुद्दा फिर्ता लिने निर्णयविरुद्ध दर्ता गरिएको रिट निवेदनको सुनुवाइ आगामी आइतबारदेखि सुरु हुने आदेश दिएको छ।
न्यायाधीश सपना प्रधान मल्ल र श्रीकान्त पौडेलको इजलासले उक्त रिट निवेदनलाई नियमित सुनुवाइका लागि पेश गर्न आदेश गरेको हो। सुनुवाइ सुरु भएपछिका दुई–तीन दिनभित्र सर्वोच्च अदालतले आफ्नो निर्णय सार्वजनिक गर्ने अपेक्षा गरिएको छ।
महान्यायाधिवक्ता सविना भण्डारी बरालले रवि लामिछानेविरुद्ध पेश भएको आरोपपत्र संशोधन गर्ने क्रममा संगठित अपराध तथा सम्पत्ति शुद्धिकरणको अभियोग फिर्ता लिन सरकारी वकिलहरूलाई निर्देशन दिएकी थिइन्।
त्यो निर्णयविरुद्ध सर्वोच्च अदालतमा तीन छुट्टाछुटै रिट निवेदन दर्ता भएका थिए। वरिष्ठ अधिवक्ता दिनेश त्रिपाठी, अधिवक्ता आभास रेग्मी, र युवराज पौडेलले रिट निवेदन दर्ता गरेका हुन्।
