वामदेव गौतम नेकपा (एमाले) मा प्रवेश गर्न तयार

बुधवार दिउँसाे सङ्घीय संसद् भवन परिसरमा सञ्चारकर्मीमाझ गाैतमले आफूसँग रहेका साथीहरूसहित एमालेमै फर्कन आफू तयार रहेको प्रतिक्रिया दिनुभएको हो । तर त्यसका लागि अध्यक्ष केपी ओलीले आफूलाई प्रस्ताव गर्नुपर्ने एमालेका उपाध्यक्षसमेत रहिसक्नुभएका गौतमको सर्त छ ।विगतमा आफूलाई रोक्नकै लागि त्याे प्रस्ताव ल्याइएको उहाँकाे बुझाइ छ ।

गाैतमले एमाले ओलीसँग भएकाले ओलीले नै आफूलाई पार्टीमा आउन भन्नुपर्ने तर्क गर्नुभयो । एमाले आफूले निर्माण गरेको पार्टी रहेको भन्दै उहाँले एमालेप्रति माया लाग्ने बताउनुभयो । उहाँले आफ्नो पार्टी सदस्यता पनि एमालेमै रहेको बताउनुभयो आफू एमालेमा अध्यक्ष वा महासचिव बन्नका लागि जान नलागेको उहाँकाे भनाइ थियाे ।

उहाँले भन्नुभयाे , ‘यदि उहाँहरुले मलाई खबर गर्नुभयो। तपाईंलाई अहिले पनि निलम्बन भएको छ। आगामी महाधिवेशनसम्म निलम्बन भइरहन्छ। तपाईं आउनु पर्‍यो भन्नुभयो भने म र मसित रहेका जेजति साथीहरु छन्, त्यो लिएर त्यहाँ एकीकृत हुन हामी जान्छौं।उहाँ (ओली) ले आउनुस् भन्नुपर्छ । किनभने पार्टी उहाँसँग छ । वामदेव गौतम एमालेमा अध्यक्ष हुन जाने होइन । महासचिव हुन जाने होइन । पार्टीमा योगदान दिन जाने हो ।’