गठबन्धनभित्रकै दलको नेता देशबाहिर रहेका बेला अर्को मोर्चा बन्यो : रवि लामिछाने

शुक्रबार  प्रतिनिधि सभाको बैठकमा मन्त्रालयगत बजेटमाथिको छलफलमा बोल्दै उनले मोर्चाबारे बुझ्नुपर्ने भएको बताएका हुन्।

लामिछाने भने ‘सरकार जनतालाई राहत दिने, मुलुकका महत्वपूर्ण मुद्दाहरूमा केन्द्रित रहनेभन्दा पनि सरकारले आफूलाई टिकाउनुपर्ने जिम्मेवारी बढी भएका कारणले सरकार कता–कता अलमलिएको हो कि भन्ने कुरा सदनलाई जानकारी गराउन चाहन्छु । नक्कली भुटानी शरणार्थी प्रकरणकै विषयलाई लिएर मैले यही संसद्मा विशेष समितिको माग गरेको थिएँ, दलको तर्फबाट। त्यसको कारण, जुन ढंगले यसको अनुसन्धान भइरहेको थियो, अनुसन्धान गर्ने निकायकै बारेमा प्रश्न आए। अनेक कुराहरू आए। तर, यस विषयमा छानबिन हुन सकेन। छानबिन त सकिएको छैन तर हाम्रो उत्तर पनि अनुत्तरित नै भयो,’ उनले भने, ‘सरकार अलमलियो। सरकार गठबन्धनभित्र पनि अर्को गठबन्धन बनाउन लाग्यो। सरकारमै सहभागी भएका दलहरूले अर्को गठबन्धन बनाएको हामीले थाहा पायौं। मोर्चा बनेको थाहा भयो। अब यो के हो? बुझ्न जरुरी भयो। त्यही गठबन्धनभित्रको दलका नेता देशमै नभएको बेलामा, सरकारमै सहभागी भएका दलहरू मिलेर मोर्चा बनाउनु, यसलाई अलि ध्यानमा राख्नुपर्छ।’

बजेटमा भइरहेको छलफलहरूको औचित्य नै पुष्टि गर्न संसद्ले नसकेको उनले बताए।