मलाई चितवन–३ सँग जोड्नु रेणु र म दुवैमाथिको अन्याय हो : प्रचण्ड

काठमाडौं । नेपाल कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले आफूलाई चितवन निर्वाचन क्षेत्र नम्बर ३ सँग जोडेर भइरहेको प्रचारबाजीप्रति आपत्ति जनाएका छन् । आफू चितवन–३ मा केन्द्रित भएको भन्ने भनाइ गलत रहेको उल्लेख गरे । प्रचण्डले निर्वाचन प्रक्रिया सुरु भएदेखि आफू चितवन–३ मा नगएको स्पष्ट पारे ।

चितवन–३ सँग आफूलाई अहिले जोड्नु भनेको आफू र नेकपाबाट चितवन निर्वाचन क्षेत्र नम्बर ३ की उमेदवार रेणु दाहालमाथि अन्याय हुने जिकिर गरे । उनले आफूले कुनै वक्तव्य वा अन्तर्वार्ता नदिए पनि त्यहाँ स्वाभाविक रूपमा बहस चलिरहेको बताए । रेणुले विगत ९ वर्षमा गरेको काम नै उनको प्रचारको मुख्य आधार भएको प्रचण्डको भनाइ छ ।