काठमाडौं : नेपाली कांग्रेसभित्र १५औं महाधिवेशनलाई लिएर देखिएको विवाद थप पेचिलो बनेका बेला सभापति गगनकुमार थापाले निवर्तमान सभापति शेरबहादुर देउवासँग प्रत्यक्ष संवाद गर्नसमेत नसकेको गुनासो गरेका छन्। पार्टीलाई एउटै प्रक्रियाबाट महाधिवेशनमा लैजाने प्रयासस्वरूप आफूले देउवासँग भेटका लागि पटक–पटक पहल गरे पनि समय पाउन नसकेको जानकारी थापाले सोमबार बसेको केन्द्रीय कार्यसम्पादन समितिको बैठकमा गराएका हुन्।
बैठकमा सहभागी एक सदस्यका अनुसार थापाले देउवाका स्वकीय सचिव भानु देउवासँग चार पटकसम्म सम्पर्क गरेर भेटको वातावरण बनाउन आग्रह गरेका थिए। ‘त्यसबाट पनि भेट हुन नसकेपछि देउवा निकटका अन्य नेताहरूसँग समेत कुराकानी गरी भेटको समय मिलाइदिन आग्रह गरेको थिएँ,’ थापाको भनाइ उद्धृत गर्दै बैठकमा सहभागी एक नेताले भने।
