भरतपुर । नेकपा एमालेका अध्यक्ष केपी शर्मा ओलीले आगामी सरकार नेकपा एमालेको बने हरेक महिलालाई वार्षिक १५ सय स्यानिटरी प्याड किन्नलाई उपलब्ध गराउने ग्यारेन्टी गरेको बताएका छन् ।
जिल्ला प्रहरी कार्यालयअगाडि रहेको गेष्ट हाउस चौरमा भएको नेकपा एमालेको चुनावी सभामा पूर्वप्रधानमन्त्रीसमेत रहेका अध्यक्ष ओलीले हरेक महिलाले बैंक खातामा महिनावारी हुँदा प्रयोग हुने स्यानिटरी प्याड खरिदका लागि वार्षिक १५ सय पठाइने बताए । उनले भने, ‘हामीले घोषणापत्रमा पनि यो राखेका छौँ, अब यसलाई कसैले हटाउन सक्दैन, ग्यारेन्टी दिन्छौँ, त्यसका लागि एमालेको सरकार चाहिन्छ ।’
अध्यक्ष ओलीले अरुको घोषणापत्र ढाँट्नका लागि ल्याइएको र एमालेको घोषणापत्र ग्यारेन्टी गर्नलाई ल्याइएको बताए ।एमालेले सार्वजनिक गरेको घोषणापत्रको ग्यारेन्टी नं १७ मा ‘स्वस्थ महिनावारी, सुरक्षित मातृत्व’को नीति कार्यान्वयन गर्ने उल्लेख छ ।
कार्यक्रममा अध्यक्ष ओलीले भने, ‘२०५१ सालमा एक सय रूपैयाँ वृद्धभत्ता दिँदा कनिका छ¥यो भन्नेले आज स्यानिटरी प्याड खरिदका लागि वार्षिक १५ सय दिन्छु भन्दा अनेक भनिरहेका छन्, तर पाँच वर्ष एमालेले गर्छ, अरुले कुरामात्रै गर्छन् ।’ सभामा अध्यक्ष ओलीले हुलाकीमार्ग बनाउनदेखि मेलम्चीको पानी ल्याउनसम्म एमाले चाहिएको बताए ।
उनले अहिलेको सरकारले केही गर्न नसकेको आरोपसमेत लगाए । उनले भने, ‘अहिले बैंकले पैसा दिन सकेको छैन, ३ महिनामा ८० अर्ब घाटामा गएको छ । राम्रो मोबाइल किन्न पाइएको छैन, राम्रो गाडी चढौँ भन्दा गाडी पाइँदैन ।’ उनले अहिलेको गठबन्धन सरकार छुचुन्द्रोजस्तो ६ गुना खानमात्रै जानेको आरोप लगाए ।
अध्यक्ष ओलीले प्रधानमन्त्री शेरबहादुर देउवालाई प्रश्न गर्दै भने, ‘देउवाजी, पाँचपटक प्रधानमन्त्री हुँदा गरेको एउटा काम नेपाली जनतालाई भन्नुस् त, मञ्चमा भन्न सक्नुहुन्न भने टेलिभिजनमा बताइदिनुस्, छ कुनै काम ?’
ओलीले नेपाली कांग्रेसका सभापति देउवा र नेकपा माओवादी केन्द्रका अध्यक्ष प्रचण्ड नक्कली औषधि भएको आरोप लगाए ।
‘अहिलेको गठबन्धन चारतिर फर्केको छ, साझा घोषणापत्र ल्याउन सकेनन्’, ओलीले भने, ‘प्रचण्डको बारेमा मैले केही भन्न पर्दैन, जनयुद्धका घाइतेहरुलाई थाहा छ, वैशाखी टेकेर हिँड्नेहरुलाई थाहा छ ।’ उनले चितवनवासीलाई कसलाई भगाउनुपर्छ र कसलाई जिताउनुपर्छ थाहा भएको बताए । ओलीले अहिलेको गठबन्धन फुटेको हाँडीको चोइटा भएको र देशका लागि अभिशाप रहेको आरोप लगाए ।
ओलीले रवि लामिछानेको नाम नै नलिई भने, ‘दमाहा, ढ्याङ्ग्रो केही पनि बजाएको छैन, जाबो एउटा घण्टी पनि बजाउन नपाउने ? बजाउँछन् मंसिर चारसम्म ।’ उनले एमालेसँग दुश्मनी गर्नेहरु सिद्धिने दाबी गरे ।
रवि लामिछानेको गाडी तोडफोडको विषयमा भत्र्सना गर्दै एमाले लोकतन्त्रको पक्षमा रहेको बताए । उनले भने, ‘एउटा युवा आएर घण्टी बजाएको छ, अत्तालिएर गाडी फुटाउन जानुपर्छ ? एमाले हिंसा, आगजनी, तोडफोडको विपक्षमा छ, यस घटनाको खेद प्रकट गर्दछ ।’
चुनावी सभामा एमाले उपाध्यक्ष रामबहादुर थापा बादल, चितवन क्षेत्र नं १ का एमालेका उमेदवार सुरेन्द्र पाण्डे, चितवन क्षेत्र नं २ का उमेदवार कृष्णभक्त पोखरेल, चितवन ३ ‘ख’ की उमेदवार सरस्वती विष्टलगायतले आगामी पाँच वर्ष एमालेको बहुमतको सरकार बन्ने दाबी गरेका थिए । उनीहरुले देशको विकास एमालेको शक्तिले मात्र गर्न सक्ने बताए ।
